ગમતાનો કરીએ ગુલાલ, - મકરંદ દવે

ગમતું મળે તો અલ્યા ગૂંજે ન ભરીએ
ને ગમતાનો કરીએ ગુલાલ,
આડા દે આંક એ તો ઓશિયાળી આંગળી,
પંડમાં સમાય એવી પ્રીતિ તો પાંગળી,
સમદરની લહેર લાખ સુણી કયાંય સાંકળી? 
ખાડા ખાબોચિયાને બાંધી બેસાય,
આ તો વરસે ગગનભરી વહાલ-.
ગાંઠે ગરથ બાંધી ખાટી શું જિંદગી?
સરી સરી જાય એને સાચવશે કયાં લગી?
આવે તે આપ કરી પળમાં પસંદગી       
મુઠ્ઠીમાં રાખતાતો માટીની પાંદડી,
ને વેર્યે ફોરમનો ફાલ-
આવી મળ્યું તે દઇશ આંસુડે ધોઇને
ઝાઝેરું જાળવ્યું તે વહેલેરુ ખોઇને,
આજ પ્રાણ જાગે તો પૂછવું શું કોઇને?
માધવ વેચંતી વ્રજનારીની સંગ,
તારા રણકી ઉઠે કરતાલ!-
ગમતું મળે તો અલ્યા,ગૂંજે ન ભરીએ
ને ગમતાનો કરીએ ગુલાલ.  

------------------------

સૌજન્યઃ
અમર ગીતો
સંપાદકઃ ચન્દ્રકાંત શેઠ